我哋嘅生活節奏快到不得之了，每日都好似打仗咁，忙工作、家庭、學業 ⋯好多時禮拜日返教會，當下有領受、好得激勵，但禮拜一二已經放低咗一半，禮拜三已經所剩無幾 ⋯

為咗應對呢個情況，教會最近有一個新嘅嘗試，將每週講道帶入生活，就係 ：

將上個主日嘅信息製作成金句圖、重點摘要或短片，逢禮拜三到禮拜六於教會 WhatsApp 群組發佈（因此，請您加入教會 WhatsApp 群組！）。

有兩個目的：

一，將主日訊息接駁日常。上主嘅話語唔應該停留喺禮拜日崇拜，佢係我哋每日嘅引導。

二，協助小組帶彼此建立。當您嘗試接駁日常，小組分享就唔會冇嘢講，更加可以基於講台嘅教導，作更深入嘅交流，互相守望。

因此，拜託大家，每日真係查看教會發佈嘅信息，唔好叮完就碌走，當冇咗回事。教會係一個身體，若然肢體之間節奏協調，教會先能夠行得到（都唔講行得好 ⋯ ），能夠有基礎同心合意向標竿直跑。

同樣重要嘅係，拜託大家喺社交媒體唔好吝嗇，多多「點讚、留言、分享」！

社交媒體演算法好現實，唯有多互動嘅信息先有機會傳開 ⋯ 我希望元福能夠喺網上播種，將上主嘅話語傳開。嗰啲受眾，其實就係您嘅親朋！

（私心一點就係，嗰啲係教牧團隊每日嘔心瀝血嘅工夫，若然壽命咁短，成件事好唔抵 ⋯ 同時，我哋自家製嘅東西見得人啦 ⋯ ）

願上主嘅話語成為大家每日腳前嘅燈、路上嘅光！主必引導！